04/07/2013 15:28:12

'Padia' pa Padi, faqja tjetër e boom-it mediatik. Surpriza Prokurori

KLSH akuzoi ditë më parë Drejtorin e Përgjithshëm të AKTI-it për shpërdorime. Pango përgjigjet, ''hakmarrje''. Në media plas sherri

TIRANE - Lajmi për padi penale ndaj Drejtorit të Përgjithshëm i AKTI Prof.Dr. Ylli Pango publikuar ditët e fundit në media u përgënjështua nga organi i akuzës i cili e hodhi poshtë, me pretendimin e mospasjes së elementëve të veprës penale.

Aktualisht KLSH e ka akuzuar në media Prof. Dr. Pangon, pas kontrollit të bërë në Prill të këtij viti, për shpërdorime me fondet e projekteve që kapnin një shifër rreth $100 mijë.

E menjëhershme ka qenë dhe deklarata e lëshuar për media nga Dr. Pango i cili e quajti as më shumë e as më pak por "akuzë e bazuar në urrejtje personale" dhe "hakmarrje" nga ana e kreut të KLSH-së, Z. Bujar Leksaj.

Në një tjetër shkrim të tij, Pango përmend një armiqësi të vjetër, "Në emër të urrejtjes, të ligës, parasë, shantazhit," dhe shkruan se e gjitha kjo, "Nuk është shpërdorim posti nga ana e vetë Bujarit ? Se shpërdorimi është ta përdoresh postin për interesa përfitim, por është edhe të shfrysh urrejtjet personale e të shkatërrosh jetë njerëzish", shkruan ai.

Prokuroria deklaron se nuk u gjet asnjë element i veprës penale dhe interpretimet e KLSH nuk qëndronin. Specialistët e KLSH-së në pretendimet e tyre kishin bërë interpretime jashtë detyrës dhe kanë komentuar se "projektet, objekt kontrolli nuk kanë pasur impakt publik", citojnë mediat shqiptare.

Urrejtje dhe zili profesionale, apo personale është ajo për të cilën flet Drejtori i AKTI-it, në kohën kur KLSH pretendon parregullsi, por fakt është që publiku ditët e fundit lexoi një version në media ku Prokuroria e tha me zor fjalën e saj.

Doriana Metollari

Dërgo me email | Stampo artikullin